ვიზიტი ეროვნული თავდაცვის აკადემიაში

Apr 15, 2022
1 min read

Updated: Aug 25

სკოლა ეისის X-XII კლასების მოსწავლეები ეროვნულ თავდაცვის აკადემიას ესტუმრნენ, სადაც აკადემიაში სწავლის შესაძლებლობებსა და იუნკერების ყოველდღიურ ცხოვრებას გაეცნენ.

საინფორმაციო შეხვედრის ფარგლებში მოსწავლეებმა მოისმინეს პრეზენტაცია აკადემიის საქმიანობის შესახებ და მიიღეს ინფორმაცია საბაკალავრო პროგრამებზე, მიღების პირობებზე, სტიპენდიებსა და გაცვლით პროგრამებზე.

მათ ასევე გაიგეს, როგორია იუნკერების დღის განრიგი, რა ეტაპებს მოიცავს აკადემიაში სწავლა და რა შესაძლებლობები აქვთ სტუდენტებს როგორც აკადემიური, ისე პროფესიული განვითარების მიმართულებით.

შეხვედრის დასრულების შემდეგ მოსწავლეებმა აკადემიის ინფრასტრუქტურაც დაათვალიერეს, რაც მათ საშუალებას აძლევდა, უფრო ნათლად წარმოედგინათ სასწავლო გარემო და ყოველდღიური ცხოვრება აკადემიაში.

მსგავსი ვიზიტები უფროსკლასელებს ეხმარება, მომავალი პროფესიისა და უმაღლესი განათლების არჩევისას გადაწყვეტილება მხოლოდ ზოგად ინფორმაციაზე არ დააფუძნონ. მათ შესაძლებლობა აქვთ, უშუალოდ ადგილზე გაეცნონ სხვადასხვა სასწავლო დაწესებულებას, დასვან კითხვები და უკეთ შეაფასონ, რამდენად შეესაბამება კონკრეტული მიმართულება მათ ინტერესებსა და სამომავლო გეგმებს.

მადლობას ვუხდით ეროვნული თავდაცვის აკადემიის წარმომადგენლებსა და იუნკერებს მასპინძლობისა და მოსწავლეებისთვის საინტერესო ინფორმაციის გაზიარებისთვის.